https://youtu.be/wN3kH4i9QSU

Акафист святей преславней и преблагословенней христовой ученице апостолу же и первей в мироносицех Магдалине Марии

Творение преподобнейшаго во иноцех кир Григория Хопольскаго

Стихира глас 1. Ко гробу Твоему Спасе:

Христу нас ради от Девы рождшемуся, честная Магдалина последова Мария, оправдания Его и заповеди сохраняя. Отнюдуже всечестная, память твою всесвятую празднующе, грех наших оставление молитвами твоими приемлем.

Кондак 1, гл 8. Взбранной воеводе:

Мироносицу вернии и равноапостольную, восхваляем тя истинно прославленную, благословим же Господа и Бога славы, дарованьми пестрьми тя украсивша, всеблаженне Марие радуяся, желанием вопием:

Радуйся, Слова ученице.

Икос 1

Достойно есть яко воистину блажити тя непрестанно, честная Магдалино мироносице: благословенно бо житие свое прешедшая, чудес точиши стремление, святолепна бывшая, верою воспевающим тебе сицевая:

Радуйся, чрез тебя же радость возвещается,

Радуйся, чрез тебя же скорбь потребляется,

Радуйся, честных мироносиц первозванная,

Радуйся, рыдания апостолов печаль прекращающая,

Радуйся, первая таинство пресладостное узревшая,

Радуйся, единая источник желания ко Христу неизъяснимый обретшая,

Радуйся, яко верных бываеши благоухание,

Радуйся, яко миром Христа помазуеши о Марие,

Радуйся, многими благодатьми исполненная,

Радуйся, цена мира изрядная,

Радуйся, тобою же вера возвещается,

Радуйся, тобою же Зиждитель прославляется,

Радуйся, Слова ученице.

Кондак 2

Спаса зря Иисуса владыку, честная Магдалино мироносице, преславная и преестественная творяща на земли, рекла еси: Господь мой еси Ты и Создатель, темже Ти вопию: Аллилуиа.

Икос 2

Разум приимши божественен, благомысленна явилася еси, Марие благодетелю твоему, демонов седмерицы отрешившися, вскорости же Ему последова, сопребывавшая и сострадавшая, темже тя желанием благоловим:

Радуйся, демонов отгнание,

Радуйся, ко Христу прилепление,

Радуйся, отрасль десятоградия пресладкая,

Радуйся, гроздовие Палестины благоразумное,

Радуйся, честное хваление предел Магдалы,

Радуйся, пребожественное украшение земли Далмунафы,

Радуйся, последовавшая Христу и с Ним пребывшая,

Радуйся, от имений своих Ему услужившая,

Радуйся, Матере Господа тезоименитая,

Радуйся, сопутница Ея прелюбезная,

Радуйся, в мироносицех первая,

Радуйся, апостолом равная,

Радуйся, Слова ученице.

Кондак 3

Слезы теплейшими, Спаса оплакала еси, зрящи на Кресте пригвожденна, и со Девой Его Матерью, и прочими женами стенающи причитала еси, состраждущи и сорыдающи, и совопия Марие: Аллилуиа.

Икос 3

Предста рыдающая со Девой Материю, Христу же на Кресте распинаему, и возлюбленному ученику и прочим женам Марие всечестная: темже мы желанию твоему дивящася, ти возгласим:

Радуйся, Кресту Христову приникающая,

Радуйся, Матери Христовой сорыдающая,

Радуйся, любви Христовой огнь неугасимый,

Радуйся, благомыслия Его источник желания неистощимый,

Радуйся, яко общница страстей владычних явилася еси,

Радуйся, яко причастница Креста Спасова показалася еси,

Радуйся, Христа распеншася узревшая,

Радуйся, от древа живота вкусившая,

Радуйся, источник спасения видевшая,

Радуйся, сладость чаши христовой приемлющая,

Радуйся, неосязаемая осязавая,

Радуйся, кровь рук Божиих отиравая,

Радуйся, Слова ученице.

Кондак 4

Ревность имея божественную внутрь сердца своего, притекла еси ко Гробу Христову, во еже умастити тело Его, страха стражник не убояся, Марие равноапостольне, но со тщанием тепле воспеваеши: Аллилуиа.

Икос 4

Слышавше боговидцы, Спаса ученицы, Марии благовествующей, честное Христово Воскресение, и радости исполньшеся ко гробу притекше, и пуст и обретше, мы же верно вопием ти:

Радуйся, ко Гробу Христову пришедшая,

Радуйся, о Христе яко мертвом рыдавшая,

Радуйся, ангелов двоицу узревшая,

Радуйся, Спаса глас услышавшая,

Радуйся, яко виде ты Воскресение Христово первая,

Радуйся, яко ты возвести учеником Его Воскресение Его,

Радуйся, рекшая ко Господу еже радуйся,

Радуйся, честным Его стопам прикоснувшаяся,

Радуйся, радости общей возвестительнице,

Радуйся, болезней лютых отгнательница,

Радуйся, к тебе же благодать возвестися,

Радуйся, к тебе же Спас явися,

Радуйся, Слова ученице.

Кондак 5

Дивная житием, и в мире светлая, Мария мироносице показася: единаго же Христа возжелавшая, вслед И тещи тепле потщися, мира Его обоняя, наслаждением вопиеши: Аллилуиа.

Икос 5

Узревый властитель ромейский, посещением твоим, свет очесем своим приявый, и яже о Христе разумевый, Егоже яко Бога суща возгласи, распенших же осуди: ты же от нас услыши:

Радуйся, криница изобильная чудес,

Радуйся, очес исцеление,

Радуйся, сокровище речений неизреченных,

Радуйся, заблуждшым свет спасительный,

Радуйся, кесарю яица чермленая в дар подавшая,

Радуйся, кровь Христову тем знаменовавшая,

Радуйся, яко пребываеши река благословения,

Радуйся, яко орошаеши благоговейных разумения,

Радуйся, гром Тиверия кесаря поразивый,

Радуйся, ромеом Христа возвестивый,

Радуйся, тобою же благочестие сияет,

Радуйся, тобою же нечестие угасает,

Радуйся, Слова ученице.

Кондак 6

Духовных наслаждений рачители, мироносице Марие, рабы твоя есмы тя чтуще, и образу твоему честному, и многоценным мощем твоим покланяющеся, благодать и исцеления почерпаем, Христа воспевая: Аллилуиа.

Икос 6

Яко светочь в мире просиявше мироносице, отгоняеши заблуждения мрак, и яко свет веру христову, языком помраченным простираеши, темже благочествуя вопием ти благодарственно:

Радуйся, людей нечестивых просвещение,

Радуйся, язык неразумных вразумление,

Радуйся, ученик спасовых равночестная,

Радуйся, дарованьми Святаго Духа исполненная,

Радуйся, яко апостол показася нам,

Радуйся, яко ты возвести Богочеловека Христа,

Радуйся, яко исполин некий всюду претекшая,

Радуйся, ны из нечестия изторгшая,

Радуйся, языки прелести свободившая,

Радуйся, души Богу друзи сотворившая,

Радуйся, чрез тебя же мрак отгоняется,

Радуйся, чрез тебя же свет водворяется,

Радуйся, Слова ученице.

Кондак 7

Ждуще преселитися, от земли к вышним, Марие мироносице Господня, во Ефесе к апостолу Богослову от Бога приити потщися, иже явльшуюся тя погребе, Христа славя и воспевая: Аллилуиа.

Икос 7

Стезю новую показала еси Марие, путеводительствуя души к небеси заблуждшия, возвещая бо Иисуса суща путь истину и живот, к Нему приводиши всех: темже от нас слышиши:

Радуйся, преславное мира стяжание,

Радуйся, многоценное Создателя создание,

Радуйся, воскресения слово уверяющая,

Радуйся, рая славу уясняющая,

Радуйся, яко вещанием твоим языки просветила еси,

Радуйся, яко ученьми твоими языки осияла еси,

Радуйся, Троическаго служения прозябение,

Радуйся, волшбы беззаконующих посечение,

Радуйся, твердое веры ограждение,

Радуйся, светлое помысла утверждение,

Радуйся, многих хвалений достояние,

Радуйся, честная мироносице Марие,

Радуйся, Слова ученице.

Кондак 8

Страннообразно прибыла еси во град Массалию, спасительное возвещая слово: и вещаньми твоими, к разумению божественному вси обратишася, песни тебе приносяще, ко Господу вопияху: Аллилуиа.

Икос 8

Блаженство безсмертия и пищу нетления, со апостолы стяжа, течение их яве и божественное жительство показавая, благодать принесе ко Христу, благословенно хвалимая:

Радуйся, Бога всеблагаго обретение,

Радуйся, винограда божественнаго лозо,

Радуйся, апостолом ревнительнице явленная,

Радуйся, страстем их причастница,

Радуйся, последоваавшая Христу в ликовании,

Радуйся, уязвленная благоговейно к Нему желанием,

Радуйся, Девы Мариам раба любезная,

Радуйся, с Неюже радость ко Спасу приявшая,

Радуйся, чистое Бога жилище,

Радуйся, честное Христа обиталище,

Радуйся, тобою же благодушие прииде,

Радуйся, тобою же малодушие отыде,

Радуйся, Слова ученице.

Кондак 9

Всякую благодать показа, ко Христу мироносице, свершати преславная всем: прузей бо потребляеши нашествие, и недугующим всем подаеши исцеление, и всякое благодеяние даруеши вопиющим: Аллилуиа.

Икос 9

Во граде Римстем сущей, тебе богомудрая Мария, таинник Павел о тебе написа: целуйте рече Мариам, яже много трудися о нас: и мы в песнех сих величаем тя:

Радуйся, сердце превластительное,

Радуйся, молво предивная,

Радуйся, Рима божественное упование,

Радуйся, Павла честное воспоминание,

Радуйся, яко сокровище неиждиваемое нетленное стяжала еси,

Радуйся, яко надмение ненасытное презрела еси,

Радуйся, град Римский усердно покорившая,

Радуйся, в Массалию страннообразно приведенная,

Радуйся, из пучины душы извлекшая,

Радуйся, многих в разуме просветившая,

Радуйся, таин Христовых самовидице,

Радуйся, всех земных презрительнице,

Радуйся, Слова ученице.

Кондак 10

Память твою совершая, всяко лето желанно, молитвенники твои быхом, якоже благомысленна Судию соделаеши, к нам прогневавшим Его, и благодать устнем даруеши еже вопити достойно: Аллилуиа.

Икос 10

Кто лепо изглаголет, добродетелей твоих множество, источник желания твоего ко Владыце, ревность твою божественную, и нрав благород, Марие всечестная, но се бо намерение приими вопиющих сицевая:

Радуйся, цевнице благочествия,

Радуйся, трубо истины,

Радуйся, нуждное добродетелй трудолюбие,

Радуйся, чудное благодати громовещание,

Радуйся, ты бо яко пчела душы нашя услаждаеши,

Радуйся, ты бо яко мироточница мира на ны изливаеши,

Радуйся, учения божественнаго течение,

Радуйся, боговедения цветоуханное наслаждение,

Радуйся, ангельские чины ублажающая,

Радуйся, святых славу услаждающая,

Радуйся, тобою же яица очермняются,

Радуйся, тобою же радости вси исполняются,

Радуйся, Слова ученице.

Кондак 11

Вещества тленнаго, исторгни скоро, верою тя чтущих Марие, и вышняя помышляти сотвори, вожделенная честная и превечная, право же Богу покланятися вовек, и благоговейне воспевати: Аллилуиа.

Икос 11

На поприще труды понесши мироносице, яко сткло мучителем показася, ради доброты твоея девственныя, и душевныя твоея красоты, паки воспеваем тя сице:

Радуйся, твердо за Христа пострадавшая,

Радуйся, мученице победы носящая,

Радуйся, чистая ясно просиявшая,

Радуйся, светло яко же зерцало блиставшая,

Радуйся, тя бо погребе ученик Богослов,

Радуйся, тя бо пренесе Лев властитель мудрый,

Радуйся, град Константинов освятившая,

Радуйся, дланию своею обитель Симоно-Петру украсившая,

Радуйся, в тебе же богатимся утешением,

Радуйся, в тебе же от бед приемлем избавление,

Радуйся, трицветная небесная дуго,

Радуйся, шестозвездная неба плеадо,

Радуйся, Слова ученице.

Кондак 12

Соделай язык мой злат, златопурпурное создание, да златыми реченьми златоизглаголю, благодати твоя златыя, имиже златосверкаеши о благодать источивая, и пети изощряеши мя безпорочно, Христу владыце: Аллилуиа.

Икос 12

Воспеваем последнее, благодарно еже радуйся, яко приношение тебе мироносице, и почесть и награду живу, такожде тебе дары изрядныя приносим, умоляюще воздати благодать твою нам вопиющим:

Радуйся, радости начало и скончание,

Радуйся, заре трисветлая и сияние,

Радуйся, пище поющих тя сладостная,

Радуйся, озарение чтущих тя ясное,

Радуйся, яко обители Новый Вифлеем слава бываеши,

Радуйся, яко длань стяжася якоже блаженство твое честное,

Радуйся, державо Макариотисы града,

Радуйся, страж его помощнице и защитнице,

Радуйся, храмов твоих божественных блюстительнице,

Радуйся, чтущих тя хранительнице,

Радуйся, верных воспевающих тя заступление,

Радуйся, с плачем молящих тя ходатайство,

Радуйся, Слова ученице.

Кондак 13

О ученице Слова, мироносице Марие, честная Магдалино христоносице, песнь сию краткую, юже тебе приносим, милостиво приими, и молитвами твоими укрепи, поющих с радованием: Аллилуиа.

Тропари на Вознесыйся на крест

Равноапостольную честную мироносицу, и ученицу Христа Спаса, целительницу всеблагую болезней, в песнех вси почтим, к ней вопиюще: предвари и свободи, молящих тя от напасти, настающей да присно тя, яко благодетельную Марие почтим.

Тропарь, глас 2. Яко со древа.

Образ твой божественный и честный всех лобызающих, и раку длани твоея, от всякаго гнева и печали избави, мироносице всеславная, и всякия нужды ныне нас свободи, яко заступленьми твоими христова ученице, всюду спасаемии вси, имя твое честное желанием верно почтим.

Кондак, глас 2. Предстательство христиан:

Желающии немощей исцеления, к раце длани мироносицы, ныне притекаем, и образу ея, благоговейне поклоняющиися, желанием воззовем о Марие, яко благодать от Бога приявшая целити недугующих, от всяких искушений и болезнований горьких, уврачуй Магдалино, в вере воспевающих тя.

Величание

Величаем тя, / мироносице святая равноапостольная Марие Магдалино, / и чтим болезни и труды твоя, / имиже трудилася еси / во благовестии Христове.